Ecloga VII SHOW LINKS TO MANUSCRIPTS
| s. | MELIBOEUS |
| 1 | Forte sub arguta consederat ilice Daphnis, |
| 2 | compulerantque greges Corydon et Thyrsis in unum, |
| 3 | Thyrsis ovis, Corydon distentas lacte capellas, |
| 4 | ambo florentes aetatibus, Arcades ambo, |
| 5 | et cantare pares et repondere parati. |
| 6 | Huc mihi, dum teneras defendo a frigore myrtos, |
| 7 | vir gregis ipse caper deerraverat; atque ego Daphnim |
| 8 | adspicio. Ille ubi me contra videt: 'Ocius' inquit |
| 9 | 'huc ades, o Meliboee; caper tibi salvos et haedi, |
| 10 | et, si quid cessare potes, requiesce sub umbra. |
| 11 | Huc ipsi potum venient per prata iuvenci; |
| 12 | hic viridis tenera praetexit harundine ripas |
| 13 | Mincius, eque sacra resonant examina quercu.' |
| 14 | Quid facerem? Neque ego Alcippen, nec Phyllida habebam, |
| 15 | depulsos a lacte domi quae clauderet agnos, |
| 16 | et certamen erat, Corydon cum Thyrdide, magnum. |
| 17 | Posthabui tamen illorum mea seria ludo. |
| 18 | Alternis igitur contendere versibus ambo |
| 19 | coepere; alternos Musae meminisse volebant. |
| 20 | Hos Corydon, illos referebat in ordine Thyrsis. |
| s. | CORYDON |
| 21 | Nymphae, noster amor, Libethrides, aut mihi carmen, |
| 22 | quale meo Codro, concedite (proxima Phoebi |
| 23 | versibus ille facit), aut, si non possumus omnes, |
| 24 | hic arguta sacra pendebit fistula pinu. |
| s. | THYRSIS |
| 25 | Pastores, hedera nascentem ornate poetam, |
| 26 | Arcades, invidia rumpantur ut ilia Codro; |
| 27 | aut, si ultra placitum laudarit, baccare frontem |
| 28 | cingite, ne vati noceat mala lingua futuro. |
| s. | CORYDON |
| 29 | Saetosi caput hoc apri tibi, Delia, parvos |
| 30 | et ramosa Micon vivacis cornua cervi. |
| 31 | Si proprium hoc fuerit, levi de marmore tota |
| 32 | puniceo stabis suras evincta coturno. |
| s. | THYRSIS |
| 33 | Sinum lactis et haec te liba, Priape, quotannis |
| 34 | exspectare sat est: custos es pauperis horti. |
| 35 | Nunc te marmoreum pro tempore fecimus; at tu, |
| 36 | si fetura gregem suppleverit, aureus esto. |
| s. | CORYDON |
| 37 | Nerine Galatea, thymo mihi dulcior Hyblae, |
| 38 | candidior cycnis, hedera formosior alba, |
| 39 | cum primum pasti repetent praesepia tauri, |
| 40 | si qua tui Corydonis habet te cura, venito. |
| s. | THYRSIS |
| 41 | Immo ego Sardoniis videar tibi amarior herbis |
| 42 | horridior rusco, proiecta vilior alga, |
| 43 | si mihi non haec lux toto iam longior anno est. |
| 44 | Ite domum pasti, si quis pudor, ite, iuvenci. |
| s. | CORYDON |
| 45 | Muscosi fontes, et somno mollior herba, |
| 46 | et quae vos rara viridis tegit arbutus umbra, |
| 47 | solstitium pecori defendite: iam venit aestas |
| 48 | torrida, iam lento turgent in palmite gemmae. |
| s. | THYRSIS |
| 49 | Hic focus et taedae pingues, hic plurimus ignis |
| 50 | semper, et adsidua postes fuligine nigri; |
| 51 | hic tantum Boreae curamus frigora, quantum |
| 52 | aut numerum lupus aut torrentia flumina ripas. |
| s. | CORYDON |
| 53 | Stant et iuniperi et castaneae hirsutae; |
| 54 | strata iacent passim sua quaeque sub arbore poma; |
| 55 | omnia nunc rident: at, si formosus Alexis |
| 56 | montibus his abeat, videas et flumina sicca. |
| s. | THYRSIS |
| 57 | Aret ager; vitio moriens sitit aeris herba; |
| 58 | Liber pampineas invidit collibus umbras: |
| 59 | Phyllidis adventu nostrae nemus omne virebit, |
| 60 | Iuppiter et laeto descendet plurimus imbri. |
| s. | CORYDON |
| 61 | Populus Alcidae gratissima, vitis Iaccho, |
| 62 | formosae myrtus Veneri, sua laurea Phoebo, |
| 63 | Phyllis amat corylos; illas dum Phyllis amabit, |
| 64 | nec myrtus vincet corylos, nec laurea Phoebi. |
| s. | THYRSIS |
| 65 | Fraxinus in silvis pulcherrima, pinus in hortis, |
| 66 | populus in fluviis, abies in montibus altis: |
| 67 | saepius at si me, Lycida formose, revisas, |
| 68 | fraxinus in silvis cedat tibi, pinus in hortis. |
| s. | MELIBOEUS |
| 69 | Haec memini, et victum frustra contendere Thyrsim. |
| 70 | Ex illo Corydon Corydon est tempore nobis. |