monumenta.ch > Solinus > 48
Solinus, Mirabilia, XLVII Assyria cum Media. In his de unguentorum origine, de arbore Medica. <<<     >>> XLIX Direum locus. Margiane regio, et in ea oppida.

Caput XLVIII Portae Caspiae. SHOW LINKS TO MANUSCRIPTS

1  Portae Caspiae panduntur itinere manu facto longo octo milibus passuum; nam latitudo vix est plaustro permeabilis. In his angustiis etiam illud asperum, quod praecisorum laterum saxa liquentibus inter se salis venis exundant humorem affluentissimum, qui constrictus vi caloris velut in aestivam glaciem corporatur: ita labes invia accessum negat. 2  Praeterea octo et viginti milium passuum tractus omnis, quoquo inde pergatur humo arida, sine praesidio sitit. Tunc serpentes undique gentium convenae a verno statim die illuc confluunt. Ita periculi ac difficultatis concordia ad Caspios nisi hieme accessus negatur.