monumenta.ch > Prosper Aquitanus > 101
Prosper Aquitanus, Epigrammata ex sententiis Augustini, C [ Alias XCVII]. De cohibenda ira. <<<     >>> CII [ Alias XCIX]. De desideriis carnis castigandis.

CI [ Alias XCVIII]. De fine sanctorum. SHOW LINKS TO MANUSCRIPTS

1  Cultor iustitiae, divinae et pacis amator,
Quem vocat ad summum vita beata bonum:
Scandere constanter dextros adnitere calles,
Despiciens laevae noxia plana viae.
2  Tutius est duros mundi tolerare labores,
Infestique hostis praelia saeva pati,
Quam victum officiis animum submittere blandis,
Captaque servili subdere colla iugo.
3  Tempore in occiduo non longi est usus honoris,
Et celeri lapsu gaudia falsa fluunt.
4  Finem igitur proprii sapiens speculabitur aevi,
Et via qua currit, quo ferat aspiciet.
5  Nam mundo innexis pars est cum principe mundi;
At servis Christi gloria Christus erit.