monumenta.ch > Prosper Aquitanus > 53
Prosper Aquitanus, Epigrammata ex sententiis Augustini, LII. De fortitudine tolerantiae. <<<     >>> LIV. De oblatione votorum.

LIII. De humilitate iustorum. SHOW LINKS TO MANUSCRIPTS

1  Iustis quidquid malorum ab iniquis dominis irrogatur, non poena est criminis, sed virtutis examen. 2  Nam bonus, etiam si serviat, liber est. 3  Malus autem, etiam si regnet, servus est; nec unius domini, sed quod est gravius, tot dominorum quot vitiorum. 4  Oppressis quoties iustis dominantur iniqui,
Non est puniti supplicium meriti;
Sed virtus fidei sub tali examine crescit,
Nec servile gravat libera corda iugum.
5  Solus peccator servit male; qui licet amplo
Utatur regno, sat miser est famulus;
Cum mens carnalis, nimium dominante tyranno,
Tot servit sceptris dedita quot vitiis.