monumenta.ch > Prosper Aquitanus > 42
Prosper Aquitanus, Epigrammata ex sententiis Augustini, XLI. De providentia Dei. <<<     >>> XLIII. De legis littera.

XLII. De impunitate peccantium. SHOW LINKS TO MANUSCRIPTS

1  Nihil est infelicius felicitate peccantium, qua poenalis nutritur impunitas, et mala voluntas, velut hostis interior, roboratur. 2  Qui se peccatis gaudet feliciter uti,
Infelix nimis est prosperitate sua.
3  Dumque capit miseros effectus prava voluntas,
A vera semper luce fit exterior.
4  Sumens pestifera de consuetudine robur,
Et sua complectens vincula mortis amor.
5  Deficiant potius vana oblectamina mundi,
Subdanturque pio colla domanda iugo,
Inque putres fibras descendat cura medentis:
Ut blandum morbum pellat amica salus.