monumenta.ch > Prosper Aquitanus > 38
Prosper Aquitanus, Epigrammata ex sententiis Augustini, XXXVII. De aeternis gaudiis. <<<     >>> XXXIX. De iussionibus Dei.

XXXVIII. De lege charitatis. SHOW LINKS TO MANUSCRIPTS

1  Lex Christi perfectio charitatis est, qua Deus proximusque diligitur: et per quam dicitur Conditori legis, Dimitte nobis debita nostra sicut et nos dimittimus debitoribus nostris. 2  Bene enim exspectat promissionem Dei, qui mandatum eius exsequitur: nec frustra sperat parcendum peccatis suis, qui ignoscit alienis. 3  Verus amor Christi vera est custodia legis,
Et mandata Dei complet amans homines.
4  Quorum ignoscentes culpis sua crimina solvunt,
Quodque aliis tribuunt, hoc sibi prospiciunt.
5  Det peccatori veniam peccator, et aequa
Conciliet Dominum conditione sibi.
6  Cuius iudicium de nostro examine pendet,
Quod serimus metimus, quod damus accipimus.