monumenta.ch > Prosper Aquitanus > 18
Prosper Aquitanus, Epigrammata ex sententiis Augustini, XVII. De supernae patriae civibus. <<<     >>> XIX. De angusta vitae via.

XVIII. De carnis cupiditate vincenda. SHOW LINKS TO MANUSCRIPTS

1  Nemo est cuius animam corruptibile corpus et inhabitatio terrena non aggravet. 2  Sed annitendum est ut cupiditates carnis spiritus vigore superentur; et interior homo, qui semper sibi sentit resisti, semper se divino exspectet auxilio adiuvari. 3  Nulla anima est, quae non mortali carne gravetur,
Nec de corporea conditione gemat.
4  Sed confirmare invalidam, et frenare rebellem,
Legitimum et proprium est mentis opus dominae.
5  Quae ius naturae, ut moderamine temperet aequo,
Et subdat sceptris noxia quaeque suis,
A Domino auxilium, et vires petat, ut valeat se
Vincere, nec sensus incitet ipsa suos.
6  Nam nullos famulae poterit compescere motus,
Ni fuerit Christi semper amore potens.