monumenta.ch > Prosper Aquitanus > 12
Prosper Aquitanus, Epigrammata ex sententiis Augustini, XI. De bonorum et malorum finibus. <<<     >>> XIII. De bono intellectu.

XII. De tranquillitate ultionis Dei. SHOW LINKS TO MANUSCRIPTS

1  Non concupiscit Deus poenam reorum, tamquam saturari desiderans ultione. 2  Sed quod iustum est cum tranquillitate decernit, et recta voluntate disponit, ut etiam mali non sint inordinati. 3  Nulla Deum oblectat miserorum poena reorum,
Nec scelerum vindex ira movet placidum.
4  Omnipotentis enim recta et tranquilla voluntas,
Quidquid decerni convenit, hoc statuit.
5  Ut nullis pateat Regis censura querelis,
Cum iuste accipiet debitus ordo malos.