monumenta.ch > Prosper Aquitanus > 1
Prosper Aquitanus, Epigrammata ex sententiis Augustini, Praefatio. <<<     >>> II. De hominibus diligendis.

I. Quae sit vera innocentia. SHOW LINKS TO MANUSCRIPTS

1  Innocentia vera est, quae nec sibi, nec alteri nocet. 2  Quoniam qui diligit iniquitatem, odit animam suam. 3  Et nemo non prius in se, quam in alterum peccat. 4  Perfecte bonus est, et vere dicitur insons.
5  Nec sibi, nec cuiquam quod noceat faciens.
6  Nam quicumque alium molitur laedere, primum
Ipsum se iaculo percutiet proprio.
7  Et cum forte animum non sit subitura facultas,
Non dubium in cordis viscere vulnus habet.
8  Nec fugit infecti sceleris mens prava reatum,
Cui nimis hoc solum quod voluit nocuit.