III SHOW LINKS TO MANUSCRIPTS
| 1 | Parentis olim siquis inpia manu |
| 2 | senile guttur fregerit, |
| 3 | edit cicutis alium nocentius. |
| 4 | o dura messorum ilia. |
| 5 | quid hoc veneni saevit in praecordiis? |
| 6 | num viperinus his cruor |
| 7 | incoctus herbis me fefellit? an malas |
| 8 | Canidia tractavit dapes? |
| 9 | ut Argonautas praeter omnis candidum |
| 10 | Medea mirata est ducem, |
| 11 | ignota tauris inligaturum iuga |
| 12 | perunxit hoc Iasonem, |
| 13 | hoc delibutis ulta donis paelicem |
| 14 | serpente fugit alite. |
| 15 | nec tantus umquam Siderum insedit vapor |
| 16 | siticulosae Apuliae |
| 17 | nec munus umeris efficacis Herculis |
| 18 | inarsit aestuosius. |
| 19 | at siquid umquam tale concupiveris, |
| 20 | iocose Maecenas, precor, |
| 21 | manum puella savio opponat tuo, |
| 22 | extrema et in sponda cubet. |