XXXI SHOW LINKS TO MANUSCRIPTS
| 1 | Quid dedicatum poscit Apollinem |
| 2 | vates? Quid orat, de patera novum |
| 3 | fundens liquorem? Non opimae |
| 4 | Sardiniae segetes feraces, |
| 5 | non aestuosae grata Calabriae |
| 6 | armenta, non aurum aut ebur Indicum, |
| 7 | non rura, quae Liris quieta |
| 8 | mordet aqua taciturnus amnis. |
| 9 | Premant Calena falce quibus dedit |
| 10 | Fortuna vitem, dives et aureis |
| 11 | mercator exsiccet culillis |
| 12 | vina Syra reparata merce, |
| 13 | dis carus ipsis, quippe ter et quater |
| 14 | anno revisens aequor Atlanticum |
| 15 | inpune: me pascust olivae, |
| 16 | me cichorea levesque malvae. |
| 17 | Frui paratis et valido mihi, |
| 18 | Latoe, dones, at, precor, integra |
| 19 | cum mente, nec turpem senectam |
| 20 | degere nec cithara carentem. |