monumenta.ch > Horatius > 10
Horatius, Carmina, 1, IX <<<     >>> XI

X SHOW LINKS TO MANUSCRIPTS

1 Mercuri, facunde nepos Atlantis,
2 qui feros cultus hominum recentum
3 voce formasti catus et decorae
4 more palaestrae,
5 te canam, magni Iovis et deorum
6 nuntium curvaeque lyrae parentem,
7 callidum quicquid placuit iocoso
8 condere furto.
9 Te, boves olim nisi reddidisses
10 per dolum amotas, puerum minaci
11 voce dum terret, viduus pharetra
12 risit Apollo.
13 Quin et Atridas duce te superbos
14 Ilio dives Priamus relicto
15 Thessalosque ignis et iniqua Troiae
16 castra fefellit.
17 Tu pias laetis animas reponis
18 sedibus virgaque levem coerces
19 aurea turbam, superis deorum
20 gratus et imis.