monumenta.ch > Florus Lugdunensis > 2
Florus Lugdunensis, Carmina religiosa, I. IN EVANGELIUM MATTHAEI. <<<     >>> III. IN EVANGELIUM IOANNIS.

II. GESTA CHRISTI DOMINI. SHOW LINKS TO MANUSCRIPTS

1  Innocui pueri, Christo benedicite Regi.
2  Sit Domini celsum benedictum in saecula nomen.
3  Solis ad occasum dulcis sonet hymnus ab ortu.
4  Cantemus Domino, magna est cui gloria Christo,
Qui solus virtute sua sessoris iniqui
Stravit equum, victosque simul submersit abysso.
5  Ecce Deus mira Salvator luce coruscat,
Ipse salus nobis, ipse est in saecula virtus.
6  Confidat devota fides, timor omnis abesto.
7  Libemus dulces Iesu de fontibus undas,
Gestaque magnifici reboemus in ordine Christi.
8  Haec polus, haec tellus, haec ponti personet aequor.
9  Quatuor haec uno cecinerunt ore beati.
10  Quatuor exsurgunt paradisi flumina fonte,
Quae cunctum largo fecundant gurgite mundum.
11  Hic igitur paradisus adest, hic arbore vitae
Aurea carpuntur florenti vertice mala.
12  Dirus abest anguis, exuberat alma voluptas.
13  Zachariae sancto sacris incensa ferenti
Angelus assistit, promittit gaudia nati,
Qui Domino Christo populorum corda pararet.
14  Mittitur ad Mariam Gabriel sacer ore corusco.
15  Nuntiat intacta venturum Virgine Christum,
Cui regnum aeternum, cui gloria fulget in aevum.
16  Zachariae uxorem Virgo veneranda salutat.
17  Protinus exsultat materno in ventre Ioannes,
Et quem voce nequit, promit per gaudia Christum.
18  Mox etiam matrem complevit Spiritus almus.
19  Exclamat Domini praesentem assistere matrem.
20  Illa Dei laudes pudibundo concinit ore.
21  Ioannes oritur, genitoris lingua profatur.
22  Ipse etiam in silvis vitam puer exigit almam,
Donec ad Israel certo se tempore monstret.
23  Nascitur in Bethleem sancta de Virgine Christus.
24  Pastores vigilant, affatur et angelus illos,
Ac regem natum coeli cecinere catervae.
25  Suscipit ipse humilis veteris mysteria legis,
Sanctificatque pium patrum pio tempore ritum,
Sic priscis finem statuit, nova surgere fecit.
26  Accipit hunc laetis Simeon sanctissimus ulnis,
Dumque Deo offertur, dum dat pia munera templo
Hunc Dominum lucis, hunc fert regem esse salutis.
27  Anna etiam devota Deo, viduata marito.
28  Iam longaeva annis, iam relligione vetusta,
Agnoscit, gratesque refert, populisque prophetat.
29  Ecce Magi adveniunt imis Orientis ab oris.
30  Se stellam vidisse ferunt, quae nuntia Regis
Clareat, et Christum iubeat venerarier ortum
Pergunt sidereo laeti radiante ducatu,
Inveniunt puerum, proni reverenter adorant,
Munera dant alacres, Christum hunc pietate fatentur.
31  Angelico monitu Aegyptum transfertur Iesus.
32  Caeduntur pueri regis livore cruenti.
33  Protinus hunc dirae sequitur sors debita mortis.
34  Rursus ab Aegypto Nazareth defertur Iesus,
Unde Nazaraei sumpsit cognomen in aevum,
Ut pridem veterem cecinit vox consona vatum.
35  Praevius hunc magno, reboans clamore Ioannes,
Austerus victu, suetoso hirsutus amictu,
Gurgite Iordanis credentum membra lavabat.
36  Iudaei proceres Christum hunc esse putantes,
Attoniti veniunt, quem se velit ille requirunt.
37  Praeconem Christi se supplice voce fatetur.
38  Agnum hunc esse Dei, hunc crimina tollere mundi
Clamitat, hunc prona cunctis pietate sequendum
Praedicat, et digito praesentem assistere monstrat.
39  Ipse etiam sacro dignatus flumine tingui
Iesus adest, humilemque viam sic dedicat altus.
40  Sanctificat latices, exemplum consecrat ingens.
41  Panduntur coeli, mox Spiritus ore columbae
Devolat, et placido mitis requiescit Iesus.
42  Ipse Pater carum conclamat ab aethere Natum.
43  Protinus hunc eremi rapit in secreta benignu
Spiritus, et zabuli tentandum afflatibus offert.
44  Vincit vincendum prece ieiunisque tyrannum.
45  Ille superba monens, in panes vertere saxa
Suggerit, summo delapsum culmine Christum
Angelicas sperare manus, seu regna tenere.
46  Ille suis humilem monstrans insistere callem,
Praeceptis obedire Dei super omnia praefert
Sic victor zabuli angelicis dat iussa ministris.
47  Regressus mira in populis virtute coruscat.
48  Vertit aquas vino, pandit Deitatis honorem.
49  Discipuli credunt, Dominumque Deumque sequuntur.
50  Paschalis festi laetanter gaudia templo
Millia mercantum modico fugat ille flagello.
51  Mirantur populi, multorum pectora credunt.
52  Praedicit propriae carnis venerabile templum
Solvendum manibus suscepta in morte cruentis,
Seque illud trinis spondet reparare diebus.
53  Mystica Nicodemo baptismi munera pandit,
Credentum populos proprio baptismate tinguit.
54  Undique concurrunt, vitalia dona frequentant.
55  Exsultat Baptista sacer ac provocat omnes.
56  Nam Christum sponsum, se sponsi dicit amicum
Illum crescere, se minui debere fatetur.
57  Filius ille Dei est, inquit, qui credit in illum,
Possidet aeternam felix per saecula vitam.
58  Qui negat, ira Dei super ipsum regnat in aevum.
59  Interea Herodem connubia foeda petentem
Obiurgat, mortemque pati quam vera silere
Eligit, hinc caeco damnatur carcere iustus.
60  Tum Galilaeorum in partes secedit Iesus.
61  Absolvit reguli mortis de limine prolem,
Atque Capharnaeae versatur moenibus urbis.
62  Aequoreis undis piscantia lina ferentes
Andraeam Petrumque vocat, Iacobum atque Ioannem.
63  Omnia mox linquunt, Domini pia iussa sequuntur.



Florus Lugdunensis, Carmina religiosa, I. IN EVANGELIUM MATTHAEI. <<<     >>> III. IN EVANGELIUM IOANNIS.
monumenta.ch > Florus Lugdunensis > 2