monumenta.ch > Dositheus > [generalia et uaria]
>>> Dositheus, Ars, de accentibus

[generalia et uaria] SHOW LINKS TO MANUSCRIPTS

1  ars grammatica est scientia emendati sermonis in loquendo et scribendo poematumque ac lectionis prudens praeceptum. 2  grammaticus est qui uniuscuiusque rei uim ac proprietatem potest explanare loquela. 3  artis grammaticae officium constat partibus quattuor, lectione emendatione enarratione iudicio. 4  lectio est uaria cuiusque scripti pronuntiatio seruiens dignitati personarum exprimensque habitum animi cuiusque. 5  emendatio est recorrectio errorum, qui per scriptum dictionemue fiunt. 6  enarratio est obscurorum sensuum quaestionumque narratio. 7  iudicium est quo poemata ceteraque scripta perpendimus et discernimus. 8  artis grammaticae initia ab elementis surgunt, elementa figurantur in litteras, litterae coguntur in syllabas, syllabis comprehenditur dictio, dictiones coguntur in partes orationis, oratio in uirtutes ac uitia descendit.