monumenta.ch > Dicuil > 5
Dicuil, Mensura, 8, IV <<<     >>> VI

V SHOW CITATION LINKS

1  Iulius Solinus de Hispania nuntians, de Gaditano freto haec refert: Gaditanum fretum a Gadibus insulis dictum. Atlanticus aestus in nostrum mare discidium immittit orbis. Nam Oceanus, quem Graii sic nominant de celeritate, ab occasu solis irrumpens, laevo latere Europam radit, Africam dextero, scissisque Calpe et Abinna montibus quos dicunt Columnas Herculis, inter Mauros funditur et Hispaniam; et a freto isto cuius XV mil. passuum efficit longitudo, latitudo vix septem, quodam ostio aperit limen interni aequoris. 2  Eamdem longitudinem fretum Gaditanum et fretum Siciliae habent. De cuius latitudine in tertio decimo Etymologiarum libro haec scripta sunt: Fretum Siciliae est arctissimum, III mil. pass. spatio Siciliam ab Italia dividens; sed iuxta Columnam Rhegiam, ut Plinius Secundus praescripsit, in latitudine mille ac dimidium solummodo habet, id est, integram leucam, hoc est, XII stadia: quia unum stadium CXXV passus possidet, unus passus quinque pedibus mensuratur. Latitudine maris Tyrrheni quater metata, ad metendam Britanniam stylum vertere conabor.