monumenta.ch > Dicuil > 4
Dicuil, Mensura, 8, III <<<     >>> V

IV SHOW CITATION LINKS

1  Plinius Secundus, postquam in tertio Naturalis Historiae libro de Italia scripserat, paulo post de insula Corsica haec scripsit: In Ligustico mari, est Corsica, quam Graeci Cyrnon appellavere, sed Tusco proprior. A septentrione in meridiem proiecta, longa passuum CLX millia; lata, maiore ex parte, L; circuitu, CCCXXV mil. Abest a Vadis Volaterranis LXII. Civitates habet XXXII et colonias. 2  Idem post pauca dicit: Sardinia minus octo millibus passuum a Corsicae extremis. Idem post pauca: Sardinia ab oriente patens CLXXXII mil., ab occidente CLXXV. Circuitus eius DLXV. Abest ab Africa Caralitano promontorio CC. 3  In libro Etymologiarum XIIIIo, de insula Sardinia sic scriptum est: Sardus, ab Hercule procreatus, cum magna multitudine a Libya profectus, Sardiniam occupavit, et ex suo vocabulo insulae nomen dedit. Haec in Africo mari facie vestigii humani, in orientem quam in occidentem latior prominet, ferme paribus lateribus quae in meridiem et septentrionem vertunt. Ex quo, ante commercium a navigantibus Graecorum, Ichnus appellata est. Terra patet in longitudinem mil. CXL, in latitudinem XL. 4  Ita ab Italia, id est, a Vadis Volaterranis usque ad Corsicam mil. LXXII. Longitudo Corsicae CLX mil. Ab extremis, hoc est, a promontorio Corsicae usque ad Sardiniam minus quam VIII. Latitudo Sardiniae a septentrione in austrum XL. A Sardinia usque ad Africam CC. Quae omnia pariter coniuncta, quasi CCCCLXX mil. passuum complent. Ita est in illa parte latitudo maris Tyrrheni. 5  Sed, quam Plinius Secundus dixit ab extremis Corsicae usque ad Sardiniam, minus quam VIII millia esse a promontorio Corsicae extendente se ad Sardiniam, illa mensura constat; quoniam XX mil. quae in primo Orosii libro, atque XIIIIo Etymologiarum scripta sunt, non ad promontoria, sed ad communia utrarumque insularum latera pertinent: ipsius Corsicae latitudinem in Orosii libro primo per XXXVI mil. passuum dilatari legimus.