monumenta.ch > Dicuil > 12
Dicuil, Mensura, 7, XI <<<     >>> XIII

XII SHOW CITATION LINKS

1  Isidorus in XII Etymologiarum codice de Phoenice ave Arabiae scripsit: Phoenix Arabiae avis dicta, quod colorem phoeniceum habeat, vel, quod sit in toto orbe singularis et unica: nam Arabes singularem et unicam Phoenicem vocant. Haec D ultra annis vivens, dum se viderit senuisse, collectis aromatum virgultis, rogum sibi instruit, et conversa ad radium solis, alarum plausu voluntarium sibi incendium nutrit: sicque iterum de cineribus suis resurgit. 2  Iulius Solinus de Arabia locutus, de praedicto alite sequentia scripsit: Apud Arabes est Phoenix avis, aquilae magnitudine, capite honorato in conum, plumis extantibus, cristatis faucibus, circa collum fulgore aureo, postera parte purpureus, praeter caudam, in qua roseis pennis caeruleus inscribitur nitor. Probatum est XLta et Dtis eam durare annis; rogos sibi struit cinnamis, quos prope Panchaeam concinnat in solis orbem struere, altaribus superpositis.