monumenta.ch > Dicuil > 7
Dicuil, Mensura, 1, VI <<<     >>> VIII

VII SHOW CITATION LINKS

1  Germania omnis et Gotthia finiuntur ab Oriente, flumine Vistla; ab Occidente, flumine Rheno; a Septentrione, Oceano; a Meridie, flumine Danubio. Patent in longitudinem, m. pm. circiter DCCC. In latitudinem CCCLXXXIIII. 2  Dacia et Alania finiuntur ab Oriente, Desertis Sarmatiae; ab Occidente, flumine Vistla; a Septentrione, Oceano; a Meridie, flumine Histro. Patent in longitudinem decies centum millia; latitudo, qua cognoscitur, m. p. CCCLXXXVI, iuxta Plinium Secundum in secundo : 3  Agrippa totum eum tractum ab Histro ad Oceanum, bis decies centum mil. passuum in longitudine; quatuor CCCC millibus in latitudine, ad flumen Vistlam a Desertis Sarmatiae, prodidit.