monumenta.ch > Dicuil > 3
Dicuil, Mensura, 1, II <<<     >>> IV

III SHOW CITATION LINKS

1  Italia finitur ab Oriente, mari Ionio; ab Occidente, Alpibus et flumine Varo; a Septentrione, mari Adriatico et flumine Arsia; a Meridie, mari Tyrrhenico. Longitudo decies centum m.p., latitudo m.p. CCCCXX; qua contrahitur, LX m.p., iuxta Plinium Secundum in eodem : 2  Italia dein, primumque eius Liguria; mox Etruria, Umbria, Latium: ibi Tiberina ostia, et Roma Terrarum caput XVI millia passuum intervallo a mari. Volscorum postea litus et Campaniae; Picentinum inde, ac Lucanum Bruttiumque, quo longissime in Meridiem ab Alpium pene lunatis iugis in maria excurrit Italia. Ab eo, Graeciae ora, mox Salentini, Pediculi, Apulii, Peligni, Frentani, Marrucini, Vestini, Sabini, Picentes, Galli, Umbri, Tusci, Veneti, Carni, Iapydes, Histri, Liburni. 3  Idem post pauca: longitudo Italiae decies centena et XX mil. passuum. Multo amplior mensura fieret Lacinium usque; ni talis obliquitas in latus digredi videretur. Latitudo eius varia est: CCCCX millia millium inter duo maria, Inferum et Superum, amnesque Varum atque Arsiam.