monumenta.ch > Aurelius Victor > 5
Aurelius Victor, de Viris Illustribus, IV <<<     >>> VI

Caput V SHOW LINKS TO MANUSCRIPTS

1  Ancus Marcius, Numae Pompilii ex filia nepos, aequitate et religione avo similis, Latinos bello domuit. 2  Murcium et Ianiculum montes urbi addidit, nova moenia oppido circumdedit. Silvas ad usum navium publicavit. Salinarum vectigal instituit. 3  Carcerem primus aedificavit. Ostiam coloniam maritimis commeatibus opportunam in ostio Tiberis deduxit. 4  Ius fetiale, quo legati ad res repetundas uterentur, ab Aequiculis transtulit, quod primus fertur Rhesus excogitasse. 5  His rebus confectis intra paucos dies immatura morte praereptus non potuit praestare qualem promiserat regem.