Venantius Fortunatus, Vita S. Remigii, 9.
| 1 | Inter huiusmodi igitur virtutum suarum insignia elegit beatus Remigius, athleta Christi, transitum lethiferi soporis excipiens, procellas mundi, senio iam urgente, deserere, et ad portum coelestis habitaculi pervenire. |
| 2 | Post cuius vero obitum tanta ad sui corporis patrocinia fidelibus remedia tribuuntur, et solis agnoscitur vivere meritis, qui tantis fulsit exemplis ( Cui vero poena dignoscitur defuisse martyrii, non devotio confessoris). |
| 3 | In illis ergo divinis templorum oraculis, ubi eius patrocinia veneramus, quidquid cum fide petitur, invenitur, et quod speratur studio, praestatur effectu. |
| 4 | Profusis ergo unanimiter precibus exoramus, ut nobis vitae salutaris spatio indulgentiam delictorum obtineat intercessio sancti Remigii pontificis cum auxilio Redemptoris. |
| 5 | Det etiam deprecatio eius generaliter in hoc mundo tranquilla pacis tempora, qui promisit iustis aeterna. |
| 6 | Quod ipse praestare dignetur, qui regnat cum Patre et Spiritu sancto, qui est benedictus in saecula. |
| 7 | Amen. |