Venantius Fortunatus, Vita Germani, LXV.
| 1 | Quanta vero fuerit virtus eius signaculi, adest inter reliqua res ista testimonii quae producitur in sequenti. |
| 2 | Cum de basilica sancti Martini ad villam sanctae ecclesiae Severiaco ( Sivray apud Turones) recurreret, adiungit in itinere quemdam Amantium iuvenem, quem deprehendit a Iudaeis duci nexum in ferreis. |
| 3 | Requiritur quid fecerit. |
| 4 | Puer respondit veraciter ob hoc duci in vinculis, quia se recusaret legibus subdi Iudaicis. |
| 5 | Tunc dissimulabant cum clave Iudaei vincula ferri reserare. |
| 6 | Facto a sancto viro desuper crucis signaculo, mox ferri sera revellitur. |