Venantius Fortunatus, Vita Germani, LIX.
| 1 | Dehinc cum ad Carnonam ( Charoy, in tractu Wastinensi) castellum accederet; quidam se ei ingerit manu contracta debilis pro eo quod die Dominico aliquid operatus sit. |
| 2 | Quem praecepit in villa Cariaco ( Chevry ) post se festinum occurrere. |
| 3 | Quo accedente, dum digitos eius sacro perungeret oleo, subito sicca palma revirescit ex altera. |
| 4 | Astricta cutis ossibus intercurrente humore relaxavit articulos. |
| 5 | Iuncturae pene disiunctae retenduntur in digitos, ariditas diuturna suffusa reflorescit in vena, statimque vulnere clausa dextera inter manus medici sana redditur et distensa. |