Venantius Fortunatus, Vita Germani, XVIII.
| 1 | Hoc autem memoriae iure perpetuo est tradendum. |
| 2 | Quidam ex Nantharici [An, Nemptodori? Nanterre?] familia, separatis ab invicem maxillarum iuncturis, ore aperto ad sanctum Virum perducitur. |
| 3 | Quem signo crucis impresso sanitati redditum vetuit ne acciperet vini potum aut carnis edulium. |
| 4 | Qui praecepto postposito ad normam sui languoris statim reductus est. |
| 5 | Sed ne praevaricantis negligentia iusto subtraheret gloriam, in Spedoteno villa rursus ei oblatus est. |
| 6 | Cuius loca maxillarum sancto perunguens oleo, ac beatis manibus mentum astringens et labia Christi nomine invocato, concussa sanctis digitis ad se iunctura revertitur, et suae fidei merito salvus domum reducitur. |