Venantius Fortunatus, Vita Germani, X.
| 1 | Accidit ut Sabarici famulus Aesarius nomine ad virum de quo loquimur iniuriam passus confugeret, supplicans ut quolibet pretio eum de insolentis domini servitio liberaret. |
| 2 | Quod indignatus Sabaricus pro Aesario et coniuge vel unico eius filio, octoginta solidos pretii nomen petiit, quominus famulos servili ditione laxaret. |
| 3 | Tamen hoc non dubitavit misericordia Iusti vel perquirere vel donare. |
| 4 | Quo pretio persoluto, contigit ut ante basilicam saepe dictus Sabaricus praeteriret, nec tamen orationi quoque occurreret. |
| 5 | Qui domum suam ingrediens, statim affligitur, ligatur, et catenis revinctus ad Sanctum perducitur. |
| 6 | Neque sic a pio Viro misericordia tollitur, sed statum missa prece eius obtinente fide purgatur. |
| 7 | Tunc adiecit Sabaricus adhuc viginti aureos ad pretium quod acceperat, et de centum solidis crux ad sepulcrum beati Symphoriani ab ipso suspensa est: quae usque hodie res est in testimonio. |
| 8 | Qua occasione filii vel filiae ita sancte conversati sunt, ut per monasteria nunc regant agmina monachorum. |
| 9 | Quae causa modo mirabili profuit patri vel germini, ut parvum genitoris flagitium posteris transiret in luctum. |