| 1 | Mater honore mihi, soror autem dulcis amore, Quam pietate, fide, pectore, corde colo: Coelesti affectu, non crimine corporis ullo, Non caro, sed hoc, quod spiritus optat, amo. |
| 2 | Testis adest Christus, Petro, Pauloque ministris, Cumque piis sociis sancta Maria videt: Te mihi non aliis oculis, animoque fuisse, Quam soror ex utero tu Titiana fores. |
| 3 | Ac si uno partu mater Radegundis utroque, Visceribus castis progenuisset, eram. |
| 4 | Et tanquam pariter nos ubera chara beatae Pavissent uno lacte fluente duos. |
| 5 | Heu! mea damna gemo, tenui ne forte susurro, Impediant sensum noxia verba meum. |
| 6 | Sed tamen est animus simili me vivere voto Si vos me dulci vultis amore coli. |