| 1 | Nubila, quae, rapido perflante Aquilone, venitis, Pendula sidereo quae movet axe rotam, Dicite qua vegetet charus mihi Gogo salutem, Quid placidis rebus mente serenus agat. |
| 2 | Si prope fluctivagi remoratur littora Rheni, Ut salmonis adeps rete trahatur aquis. |
| 3 | Aut super uviferae Musellae obambulat amnem, Quod levis ardentem temperet aura diem. |
| 4 | Pampinus, et fluvius medius ubi mitigat aestus; Vitibus umbra rigens, fluctibus unda recens. |
| 5 | Aut Mosa dulce sonans, quo grus, ganta anser, olorque est, Triplice merce ferax, alite, pisce, rate. |
| 6 | An tenet herbosis qua frangitur Axona ripis. |
| 7 | Cuius aluntur aquis pascua, prata, seges; Isara, Sara, Chares, Schaldis, Saba, Somena, Sura, Seu qui Mettin adit, de sale [Ms., Salia] nomen habens? |
| 8 | Aut aestiva magis nemorum, saltusque pererrans, Cuspide, rete feras hinc ligat, inde necat? |
| 9 | Ardennae, an Vosagi, cervi, caprae, helicis ursi Caede sagittifera silva fragore tonat? |
| 10 | Seu validi bufali ferit inter cornua campum, Nec mortem differt ursus, onager, aper? |
| 11 | An sua rura colens, exusta novalia sulcat, Et rude cervici taurus aratra gemit? |
| 12 | Sive palatina residet modo laetus in aula, Cui schola congrediens plaudit amore sequax? |
| 13 | An, cum dulce Lupo pietatis iura retractat, Consilioque pari mitia mella creant? |
| 14 | Quo pascatur inops, viduae solatia praestent, Parvus tutorem sumat, egenus opem. |
| 15 | Quidquid agunt pariter, felicia vota secundent; Et valeant Christi regis amore frui. |
| 16 | Vos precor, o venti, qui curritis, atque reditis, Pro Fortunato nuntia ferte suo. |