| 1 | Victor ab occasu, quem laus extendit in ortum, Et facit egregium principis esse caput. |
| 2 | Quis tibi digna ferat? |
| 3 | nam me vel dicere pauca, Non trahit ingenium, sed tuus urget amor. |
| 4 | Si nunc Virgilius, si forsitan esset Homerus, Nomine de vestro iam legeretur opus. |
| 5 | Sigeberte potens, generosis clare triumphis, Hinc nova te virtus praedicat, inde genus. |
| 6 | Cuius rapta semel sumpsit Victoria pennas, Et tua vulgando prospera facta, volat. |
| 7 | Saxone Thuringi resonant, sua damna moventes, Unius ad laudes tot cecidisse viros. |
| 8 | Quod tunc ante aciem pedibus prior omnibus isti, Hinc modo te reges unde sequantur habent Prosperitate nova pacem tua bella dederunt, Et peperit gladius gaudia certa tuus. |
| 9 | Plus tamen ut placeas, cum sit victoria iactans, Tu magis unde subis, mitior inde manes. |
| 10 | Est tibi summus honor, sed mens praecessit honorem, Moribus et vestris debitus extet [exstat] apex. |
| 11 | Iustitiae cultor, pietatis amore coruscas, Quod te plus habeat, certat utrumque bonum. |
| 12 | Lingua, decus, virtus, bonitas, mens, gratia pollent, Ornarent cunctos singula vestra viros. |
| 13 | Cunctorum causas intra tua pectora condis, Pro populi requie te pia cura tenet. |
| 14 | Omnibus una salus datus es, quali ordine sacro, Tempore praesenti gaudia prisca refers. |
| 15 | Catholico cultu decorata est optima coniux, Ecclesiae crevit, te faciente, domus. |
| 16 | Reginam meritis Brunichildem Christus amore Tunc sibi coniunxit, hanc tibi quando dedit. |
| 17 | Altera vota coles melius, quia, munere Christi, Pectora iuncta prius, plus modo lege placent. |
| 18 | Rex pie reginae tanto de lumine gaude: Acquisita bis est, quae tibi nupta semel. |
| 19 | Pulchra, modesta, decens, solers, grata, atque benigna, Ingenio, vultu, nobilitate potens. |
| 20 | Sed quamvis tantum meruisset sola decorem, Ante tamen homini, nunc placet ecce Deo. |
| 21 | Saecula longa micans, chara cum coniuge ducas, Quam tibi divinus consociavit amor. |