| 1 | Culmen honorificum, Patrum Pater, archisacerdos, Pontificale decus proficiente gradu. |
| 2 | Quem fidei titulus meritis erexit in altum, Ecclesiaeque caput, distribuente Deo. |
| 3 | Discipule egregii bone Magnerice Niceti, Nominis auspicio Magne canende tui. |
| 4 | Clare sacro merito, tanto informate magistro, Quem reparas operum fructificante loco. |
| 5 | Cuius, opime, sequax, sancta et vestigia servans, Rite minister agens, ecce magister ades. |
| 6 | Auctorisque pii successor dignus haberis, Haeredisque sui frugiparensque manet. |
| 7 | Crevit post obitum pater, et te crescere fecit, Dum capit ille polum, tu capis arce locum. |
| 8 | Grex alitur pro te, vice praecessoris, alumne; Nec sua damna dolet, dum tua lucra tenet. |
| 9 | Fratribus optandus, iucundus honore ministris, Charius et populis pastor amore places. |
| 10 | Te panem esuriens, tectum hospes, nudus amictum, Te fessus requiem, spem peregrinus habet. |
| 11 | Haec faciens intende magis, venerande sacerdos, Ut commissa tibi dupla talenta feras. |
| 12 | Pro Fortunato exorans quoque dulcis amator, Spem mihi dans veniae, fit tibi palma, Pater. |