| 1 | Ad Gregorium episcopum pro infirmitate sua Venit ad aegrotum medici vox alma Gregori urbe ex Toronica, dum cubo rure toro, concite presbytero recitante Leone sereno, irem ut Martini sunt ubi festa pii. |
| 2 | tum, fateor, morbi grave debilitate laborans febre calens summa iam rigor imus eram. |
| 3 | hinc fragili nimium forti languore redacto ilia lassa levans halitus aeger erat. |
| 4 | ibat anhelanti vapor aridus ora perurens, ibat ab arcanis flatilis aura coquens. |
| 5 | fervor eram totus, tristis rogus, igne caminus, febris et in fibris stabat operta patens, donec Christus opem sudore undante refudit, fervidus et gelidas ignis abegit aquas. |
| 6 | redditus ergo isti, pater alme, saluto saluti: auxilium exili sis, rogo, pastor ovi. |