| 1 | Ad eandem cum rediit Vnde mihi rediit radianti lumine vultus? quae nimis absentem te tenuere morae? abstuleras tecum, revocas mea gaudia tecum, paschalemque facis bis celebrare diem. |
| 2 | quamvis incipiant modo surgere semina sulcis, hic egomet hodie te revidendo meto. |
| 3 | colligo iam fruges, placidos conpono maniplos: quod solet Augustus mensis, Aprilis agit; et licet in primis modo gemma et pampinus exit, iam meus autumnus venit et uva simul. |
| 4 | malus et alta pirus gratos modo fundit odores, sed cum flore novo iam mihi poma ferunt. |
| 5 | quamvis nudus ager nullis ornetur aristis, omnia plena tamen te redeunte nitent. |