| 1 | Ad Sigimundum et Alagisilum Nomina amicorum mihi dulcis epistula pandit: hinc Sigimunde nitens, hinc Alagisle decens. |
| 2 | prosperitas felix ventorum flamina fudit, quando mihi caros nuntiat aura viros. |
| 3 | testor utrumque caput, tantum mea vota iuvantur quantum fit florens laeta sub imbre seges. |
| 4 | ne sitiam rabidis aestivo tempore flammis, nectarei fontis me recreastis aquis. |
| 5 | post Italas terras mittis mihi, Ebene, parentes; adventu fratrum non peregrinus ero. |
| 6 | tempore belligero pacis nova gaudia surgunt, hi quia venerunt quos meus optat amor. |
| 7 | qui mihi festivae diei duplicastis honorem, sic vester crescat munere regis honor. |