| 1 | Item ad Lupum ducem Officiis intente piis, memorator amantis, prompte per affectum consuliture tuum, carius absentis nimium miseratus amici, quando latente loco signa requirit amor: unde meis meritis datur hoc, ut protinus esset spes Fortunati cura benigna Lupi? exul ab Italia nono, puto, volvor in anno litoris Oceani contiguante salo: tempora tot fugiunt et adhuc per scripta parentum nullus ab exclusis me recreavit apex. |
| 2 | quod pater ac genetrix, frater, soror, ordo nepotum, quod poterat regio, solvis amore pio. |
| 3 | pagina blanda tuo sub nomine missa benigne nectarei fontis me recreavit aquis. |
| 4 | nec solum a vobis me dulcis epistula fovit, missus adhuc in rem portitor ecce venit. |
| 5 | munera quis poterit, rogo, tot memor ore referre? affectum dulcem pandere lingua nequit. |
| 6 | sed tibi restituat rex cuncta supernus ab alto, quae minimis fiunt qui docet esse suum. |