| 1 | Epitaphium domni Praesidi Vita brevis hominum, sed non brevis illa piorum, dum migrante die prosperiora tenent. |
| 2 | qui meruere magis de carcere carnis euntes post tenebras mundi luce perenne frui. |
| 3 | ex quibus hic recubans meritis Praesidius almis carne tenet tumulum , spiritus igne polum. |
| 4 | pectore de proprio Christi responsa rigando multorum extinxit fonte fluente sitim. |
| 5 | invitans instanter oves ad pascua regis distribuit dulcem fratribus ore salem. |
| 6 | nam quotiens monachus peccati est vulnere fixus missus ad artificem, certa medella fuit. |
| 7 | ibat ad abbatem famulans sanctumque magistrum discipulus humilis, qui fuit ante tumens. |
| 8 | talibus officiis intentus amore Tonantis inter et angelicos fulget honore choros. |