| 1 | De Bertechramno episcopo, cum elevaretur in currum Curriculi genus est memorat quod Gallia raedam: molliter incedens orbita sulcat humum ; exiliens duplici biiugo volat axe citato atque movet rapidas iuncta quadriga rotas. |
| 2 | huc ego dum famulans comitatu iungor eodem et mea membra cito dum veherentur equo, pontificisque sacri Bertechramni actus honore conprendente manu raptus in axe levor. |
| 3 | qualiter inplumes fetus pia mater hirundo confovet et placide pinnula tensa tegit, sic bonitate potens, affectu dives opimo in proprium pastor molle sedile locat. |
| 4 | nec solum amplectens pia mens, sed diligit omnes, unde magis populis unicus extat amor. |