| 1 | De pontifice Carentino Coloniae Carentine, decus fidei, deitatis amice, nomine de proprio care, perennis amor, pontificem pollens Agripina Colonia praefert, frugiferis agris digne colone dei. |
| 2 | si videas aliquos quacumque ex gente creatos, quamvis ignotos mox facis esse tuos. |
| 3 | quos semel adfectu adstringis pietate paterna ulterius numquam dissociare potes; nec subito veniens veluti fugitiva recedit, sed concessa cito gratia fixa manet. |
| 4 | verba dei conplens sicut te diligis ipsum, a te ita diligitur proximus omnis homo. |
| 5 | vocis apostolicae sectator dignus haberis, quae caros animos praeposuit fidei. |
| 6 | tranquillus placidus mitis, sine nube serenus, cui rabies mundi nil dominare potest, pectora cunctorum reficis dulcedine verbi, laetificas vultu tristia corda tuo. |
| 7 | pauperibus cibus es, sed et esurientibus esca, rite pater populi dando salutis opem. |
| 8 | aurea templa novas pretioso fulta decore; tu nites, unde dei fulget honore domus. |
| 9 | maioris numeri quo templa capacia constent, alter in excelso pendulus ordo datur. |
| 10 | sollicitat pia cura gregis te, pastor opime, nil lupus ab stabulis quo vigilante rapit. |
| 11 | tempora longaevo teneas felicia tractu et per te domini multiplicentur oves. |