monumenta.ch > Thomas de Aquino > ST III 82.3 > ST III 66.2 > ST III 80.3 > ST III 79.3 > 1 > ST I 83.2 > > ST III 25.2 > ST III 2.11 > ST I 54.2 > ST I 85.3 > ST III 13.2 > ST III 87.3 > ST I 89.2 > ST I 63.2 > ST II-II 125.2 > ST III 58.2 > ST III 71.3 > ST III 17.2 > ST III 2.12 > ST III 73.3 > ST III 39.2 > ST III 81.2 > ST III 76.5 > ST I 75.2 > ST III 62.2 > ST III 72.11 > ST III 65.2 > ST III 12.2 > ST III 85.5 > ST III 32.3 > ST III 53.2 > ST I 49.2 > ST III 72.12 > ST I 93.2 > ST I 43.2 > ST III 2.10 > ST III 11.2 > ST III 19.2 > ST III 70.2 > ST III 47.2 > ST III 31.2 > ST III 88.2 > ST I 52.2 > ST I 90.2 > ST III 77.3 > ST III 10.2 > ST III 72.10 > ST I 86.2 > ST III 24.2 > ST I 92.2 > ST I 79.13 > ST III 34.2 > ST I 55.2 > ST I 99.2 > ST III 28.2 > 13 > ST I 79.11 > ST III 44.2 > ST I 37.2 > ST III 2.2 > ST III 35.2 > ST III 38.2 > ST III 59.2 > ST I 29.2 > 11 > ST I 45.2 > ST III 74.2 > ST I 79.12 > ST III 40.2 > ST III 76.3 > ST III 14.2 > ST III 85.3 > 12 > ST III 83.2 > ST III 72.2 > ST III 54.2 > ST I 60.2 > ST III 63.2 > ST III 89.2 > ST I-II 114.7 > ST I 61.2 > ST I 36.2 > ST II-II 188.7 > ST III 75.2 > ST II-II 180.7 > ST I 79.10 > ST I 21.2 > ST I 41.2 > 10 > ST II-II 141.7 > 1 > ST I 20.2 > ST I 97.2 > ST III 49.2 > ST II-II 184.7 > ST I 46.2 > ST III 43.2 > ST II-II 118.1 > ST I 68.2 > ST I 84.2 > ST I 33.2 > ST II-II 118.pr > ST III 90.2 > ST III 52.2 > 6 > ST II-II 186.7 > ST I 82.2 > ST III 68.11 > ST III 46.11 > ST II-II 118.6 > ST II-II > 2 > ST I 79.2 > ST I 80.2 > ST III 86.2
ST III 86, Articulus 1 <<<     >>> Articulus 3

, Articulus 2

arg	Ad secundum sic proceditur. Videtur quod sine poenitentia peccatum remitti possit. Non enim est minor virtus Dei circa adultos quam circa pueros. Sed pueris peccata dimittit sine poenitentia. Ergo etiam et adultis.
a2	Praeterea, Deus virtutem suam sacramentis non alligavit. Sed poenitentia est quoddam sacramentum. Ergo virtute divina possunt peccata sine poenitentia dimitti.
a3	Praeterea, maior est misericordia Dei quam misericordia hominis. Sed homo interdum remittit offensam suam homini etiam non poenitenti, unde et ipse dominus mandat, Matth. V, 'diligite inimicos vestros, benefacite his qui oderunt vos'. Ergo multo magis Deus dimittit offensam suam hominibus non poenitentibus.
sc	Sed contra est quod dominus dicit, Ierem. XVIII, 'si poenitentiam egerit gens illa a malo quod fecit, agam et ego poenitentiam a malo quod cogitavi ut facerem ei'. Et sic e converso videtur quod, si homo poenitentiam non agat, quod Deus ei non remittat offensam.
co	Respondeo dicendum quod impossibile est peccatum actuale mortale sine poenitentia remitti, loquendo de poenitentia quae est virtus. Cum enim peccatum sit Dei offensa, eo modo Deus peccatum remittit quo remittit offensam in se commissam. Offensa autem directe opponitur gratiae, ex hoc enim dicitur aliquis alteri esse offensus, quod repellit eum a gratia sua. Sicut autem habitum est in secunda parte, hoc interest inter gratiam Dei et gratiam hominis, quod gratia hominis non causat, sed praesupponit bonitatem, veram vel apparentem, in homine grato, sed gratia Dei causat bonitatem in homine grato, eo quod bona voluntas Dei, quae in nomine gratiae intelligitur, est causa boni creati. Unde potest contingere quod homo remittat offensam qua offensus est alicui, absque aliqua immutatione voluntatis eius, non autem potest contingere quod Deus remittat offensam alicui absque immutatione voluntatis eius. Offensa autem peccati mortalis procedit ex hoc quod voluntas hominis est aversa a Deo per conversionem ad aliquod bonum commutabile. Unde requiritur ad remissionem divinae offensae quod voluntas hominis sic immutetur quod convertatur ad Deum, cum detestatione praedictae conversionis et proposito emendae. Quod pertinet ad rationem poenitentiae secundum quod est virtus. Et ideo impossibile est quod peccatum alicui remittatur sine poenitentia secundum quod est virtus. Sacramentum autem poenitentiae, sicut supra dictum est, perficitur per officium sacerdotis ligantis et solventis. Sine quo potest Deus peccatum remittere, sicut remisit Christus mulieri adulterae, ut legitur Ioan. VIII, et peccatrici, ut legitur Luc. VII. Quibus tamen non remisit peccata sine virtute poenitentiae; nam, sicut Gregorius dicit, in homilia, per gratiam traxit intus, scilicet ad poenitentiam, 'quam per misericordiam suscepit foris'.
ad1	Ad primum ergo dicendum quod in pueris non est nisi peccatum originale, quod non consistit in actuali deordinatione voluntatis, sed in quadam habituali deordinatione naturae, ut in secunda parte habitum est. Et ideo remittitur eis peccatum cum habituali immutatione per infusionem gratiae et virtutum, non autem cum actuali. Sed adulto in quo sunt actualia peccata, quae consistunt in deordinatione actuali voluntatis, non remittuntur peccata, etiam in Baptismo, sine actuali immutatione voluntatis, quod fit per poenitentiam.
ad2	Ad secundum dicendum quod ratio illa procedit de poenitentia secundum quod est sacramentum.
ad3	Ad tertium dicendum quod misericordia Dei est maioris virtutis quam misericordia hominis in hoc, quod immutat voluntatem hominis ad poenitendum, quod misericordia hominis facere non potest.

Thomas de Aquino HOME