Terentius, Eunuchus, 3, Scaena V. Chaerea Antipho
| 1 | CH. Numquis hic est? nemost. numquis hinc me sequitur? nemo homost. |
| 2 | iamne erumpere hoc licet mi gaudium? pro Iuppiter, |
| 3 | nunc est profecto interfici quom perpeti me possum, |
| 4 | ne hoc gaudium contaminet vita aegritudine aliqua. |
| 5 | sed neminemne curiosum intervenire nunc mihi |
| 6 | qui me sequatur quoquo eam, rogitando obtundat enicet |
| 7 | quid gestiam aut quid laetu' sim, quo pergam, unde emergam, ubi siem |
| 8 | vestitum hunc nanctu', quid mi quaeram, sanu' sim anne insaniam! |
| 9 | AN. adibo atque ab eo gratiam hanc, quam video velle, inibo. |
| 10 | Chaerea, quid est quod sic gestis? quid sibi hic vestitu' quaerit? |
| 11 | quid est quod laetus es? quid tibi vis? satine sanu's? quid me adspectas? |
| 12 | quid taces? CH. o festu' dies hominis! amice, salve: |
| 13 | nemost hominum quem ego nunc magis cuperem videre quam te. |
| 14 | AN. narra istuc quaeso quid sit. CH. immo ego te obsecro hercle ut audias. |
| 15 | nostin hanc quam amat frater? AN. novi: nempe, opinor, Thaidem. |
| 16 | CH. istam ipsam. AN. sic commemineram. CH. quaedam hodie est dono data |
| 17 | virgo: quid ego eiu' tibi nunc faciem praedicem aut laudem, Antipho, |
| 18 | quom ipsum me noris quam elegans formarum spectator siem? |
| 19 | in hac commotu' sum. AN. ain tu? CH. primam dices, scio, si videris. |
| 20 | quid multa verba? amare coepi. forte fortuna domi |
| 21 | erat quidam eunuchu' quem mercatu' fuerat frater Thaidi, |
| 22 | neque is deductus etiamdum ad eam. submonuit me Parmeno |
| 23 | ibi servo' quod ego arripui. AN. quid id est? CH. tacitu' citius audies: |
| 24 | ut vestem cum illo mutem et pro illo iubeam me illoc ducier. |
| 25 | AN. pro eunuchon? CH. sic est. AN. quid ex ea re tandem ut caperes commodi? |
| 26 | CH. rogas? viderem audirem essem una quacum cupiebam, Antipho. |
| 27 | num parva causa aut prava ratiost? traditus sum mulieri. |
| 28 | illa ilico ubi me accepit, laeta vero ad se abducit domum; |
| 29 | commendat virginem. AN. quoi? tibine? CH. mihi. AN. satis tuto tamen? |
| 30 | CH. edicit ne vir quisquam ad eam adeat et mihi ne abscedam imperat; |
| 31 | in interiore parti ut maneam solu' cum sola. adnuo |
| 32 | terram intuens modeste. AN. miser. CH. 'ego' inquit 'ad cenam hinc eo.' |
| 33 | abducit secum ancillas: paucae quae circum illam essent manent |
| 34 | noviciae puellae. continuo haec adornant ut lavet. |
| 35 | adhortor properent. dum adparatur, virgo in conclavi sedet |
| 36 | suspectans tabulam quandam pictam: ibi inerat pictura haec, Iovem |
| 37 | quo pacto Danaae misisse aiunt quondam in gremium imbrem aureum. |
| 38 | egomet quoque id spectare coepi, et quia consimilem luserat |
| 39 | iam olim ille ludum, inpendio magis animu' gaudebat mihi, |
| 40 | deum sese in hominem convortisse atque in alienas tegulas |
| 41 | venisse clanculum per inpluvium fucum factum mulieri. |
| 42 | at quem deum! 'qui templa caeli summa sonitu concutit.' |
| 43 | ego homuncio hoc non facerem? ego illud vero ita feci-ac lubens. |
| 44 | dum haec mecum reputo, accersitur lavatum interea virgo: |
| 45 | iit lavit rediit; deinde eam in lecto illae conlocarunt. |
| 46 | sto exspectans siquid mi imperent. venit una, 'heus tu' inquit 'Dore, |
| 47 | cape hoc flabellum, ventulum huic sic facito, dum lavamur; |
| 48 | ubi nos laverimu', si voles, lavato.' accipio tristis. |
| 49 | AN. tum equidem istuc os tuom inpudens videre nimium vellem, |
| 50 | qui esset status, flabellulum tenere te asinum tantum. |
| 51 | CH. vix elocutast hoc, foras simul omnes proruont se, |
| 52 | abeunt lavatum, perstrepunt, ita ut fit domini ubi absunt. |
| 53 | interea somnu' virginem opprimit. ego limis specto |
| 54 | sic per flabellum clanculum; simul alia circumspecto, |
| 55 | satin explorata sint. video esse. pessulum ostio obdo. |
| 56 | AN. quid tum? CH. quid 'quid tum,' fatue? AN. fateor. CH. an ego occasionem |
| 57 | mi ostentam, tantam, tam brevem, tam optatam, tam insperatam |
| 58 | amitterem? tum pol ego is essem vero qui simulabar. |
| 59 | AN. sane hercle ut dici'. sed interim de symbolis quid actumst? |
| 60 | CH. paratumst. AN. frugi es: ubi? domin? CH. immo apud libertum Discum. |
| 61 | AN. perlongest, sed tanto ocius properemu': muta vestem. |
| 62 | CH. ubi mutem? perii; nam domo exsulo nunc: metuo fratrem |
| 63 | ne intus sit; porro autem pater ne rure redierit iam. |
| 64 | AN. eamus ad me, ibi proxumumst ubi mutes. CH. recte dicis. |
| 65 | eamus; et de istac simul, quo pacto porro possim |
| 66 | potiri, consilium volo capere una tecum. AN. fiat. |