Suetonius, De vita Caesarum, Iulius, 72

monumenta.ch > Suetonius > 46 > 8 > 74 > 4 > 73 > 83 > 72
Suetonius, De vita Caesarum, Iulius, LXXI <<< >>> LXXIII

Suetonius, De vita Caesarum, Iulius, Caput LXXII

1 Amicos tanta semper facilitate indulgentiaque tractavit, ut Gaio Oppio comitanti se per silvestre iter correptoque subita valitudine deversoriolo eo, quod unum erat, cesserit et ipse humi ac sub divo cubuerit. Iam autem rerum potens quosdam etiam infimi generis ad amplissimos honores provexit, cum ob id culparetur, professus palam, si grassatorum et sicariorum ope in tuenda sua dignitate usus esset, talibus quoque se parem gratiam relaturum.