Suetonius, De vita Caesarum, Claudius, 22

monumenta.ch > Suetonius > 26 > 39 > 10 > 22
Suetonius, De vita Caesarum, Claudius, XXI <<< >>> XXIII

Suetonius, De vita Caesarum, Claudius, Caput XXII

1 Quaedam circa caerimonias civilemque et militarem morem, item circa omnium ordinum statum domi forisque aut correxit aut exoleta revocavit aut etiam nova instituit. In cooptandis per collegia sacerdotibus neminem nisi iuratus nominavit; observavitque sedulo, ut quotiens terra in urbe movisset, ferias advocata contione praetor indiceret, utque dira ave in Capitolio visa obsecratio haberetur, eamque ipse iure maximi pontificis pro rostris populo praeiret summotaque operariorum servorumque turba.