Suetonius, De vita Caesarum, Claudius, 18

monumenta.ch > Suetonius > 8 > 85 > 71 > 18
Suetonius, De vita Caesarum, Claudius, XVII <<< >>> XIX

Suetonius, De vita Caesarum, Claudius, Caput XVIII

1 Urbis annonaeque curam sollicitissime semper egit. Cum Aemiliana pertinacius arderent, in diribitorio duabus noctibus mansit ac deficiente militum ac familiarum turba auxilio plebem per magistratus ex omnibus vicis convocavit ac positis ante se cum pecunia fiscis ad subveniendum hortatus est, repraesentans pro opera dignam cuique mercedem. 2 Artiore autem annona ob assiduas sterilitates detentus quondam medio Foro aturba conviciisque et simul fragminibus panis ita infestatus, ut aegre nec nisi postico evadere in Palatinus valuerit, nihil non excogitavit ad invehendos etiam tempore hiberno commeatus. Nam et negotiatoribus certa lucra proposuit suscepto in se damno, si cui quid per tempestates accidisset, et naves mercaturae causa fabricantibus magna commoda constituit pro condicione cuiusque: