Suetonius, De vita Caesarum, Augustus, 20

monumenta.ch > Suetonius > 20
Suetonius, De vita Caesarum, Augustus, XIX <<< >>> XXI

Suetonius, De vita Caesarum, Augustus, Caput XX

1 Externa bella duo omnino per se gessit, Delmaticum adulescens adhuc et Antonio devicto Cantabricum. Delmatico etiam vulnera excepit, una acie dextrum genu lapide ictus, altera et crus et utrumque brachium ruina pontis consauciatus. Reliqua per legatos administravit, ut tamen quibusdam Pannonicis atque Germanicis aut interveniret aut non longe abesset, Ravennam vel Mediolanum vel Aquileiam usque ab urbe progrediens.