Serenus Sammonicus, Medicinalis, XXXVIII. Carboni tollendo
| 1 | horrendus magis est perimit qui corpora carbo: |
| 2 | urit hic inclusus, vitalia rumpit apertus. |
| 3 | Hunc veteres olim variis pepulere medellis. |
| 4 | Tertia namque Titi simul et centesima Livi |
| 5 | charta docet, ferro talem candente dolorem |
| 6 | exactum aut poto raporum semine pulsum; |
| 7 | ni fieret, dixit, vix septem posse diebus |
| 8 | vitam produci: tanta est violentia morbi. |
| 9 | Dulcacidum laticem cum lini semine iunge |
| 10 | atque fimum Paphiae pariter compone columbae: |
| 11 | hinc line duratas partes et clausa venena. |
| 12 | Praeterea triti reserant adoperta lupini. |
| 13 | Nonnullus calcem vivam dissolvit aceto |
| 14 | fumantemque nivem papulis apponit acerbis. |
| 15 | Est qui gallinae perducat stercore corpus. |
| 16 | Alia vel piperi iuste commixta linuntur. |
| 17 | Pythagorae cognata levi condita cumino |
| 18 | proderit aut madida fermentum polline turgens. |