Serenus Sammonicus, Medicinalis, XXXVI. Ischiae et articulari morbo
| 1 | saepius occultus victa coxendice morbus |
| 2 | perfurit et gressus diro languore moratur. |
| 3 | Populus alba dabit medicos de cortice potus; |
| 4 | nec non et tenerae gracili de fronde genestae |
| 5 | arreptos caules acidoque liquore madentes |
| 6 | sumere conveniet, rubiam quoque ducere potu |
| 7 | aut ex Bithyno cocleas haurire Lyaeo. |
| 8 | Si vero articulos tabes inimica per omnes |
| 9 | haeserit, ex ficu betas cum melle ligabis |
| 10 | vel pelagi latices, simul et Baccheia dona |
| 11 | sumere curabis: nimio sed parcito vino: |
| 12 | Ennius ipse pater, dum pocula siccat iniqua, |
| 13 | hoc vitio tales fertur meruisse dolores. |