Serenus Sammonicus, Medicinalis, XXXV. Omnibus obscaenis medendis
| 1 | dicendum et quae sit membris medicina pudendis. |
| 2 | Languidus antiquo purgatur penis Iaccho |
| 3 | ac super inlinitur fecundae felle capellae. |
| 4 | Mane novo myrti frondes commandere prodest |
| 5 | qui dolet, atque illas in vulnus despuat ipsum. |
| 6 | Faece etiam vini genitalia lauta levantur, |
| 7 | et tumidos testes Nereia lympha coercet |
| 8 | vel bulbi ex mulso vel cera inmixta cupresso |
| 9 | aut faba cum tepidis Bacchi decocta fluentis. |
| 10 | Ramicis inmensum fertur cohibere tumorem |
| 11 | far madidum lymphis et feralis fronde cupressi, |
| 12 | unde etiam potu frons haec memoratur amica. |
| 13 | Sin autem existet duratis glandibus inguen, |
| 14 | proderit induci cocleas cum melle minutas. |
| 15 | Obscaenos si pone locos nova vulnera carpent, |
| 16 | horrentum mansa curantur fronde ruborum. |
| 17 | At si iam veteri succedit fistula morbo, |
| 18 | mustelae cinere immisso purgabitur ulcus, |
| 19 | sanguine vel ricini, quem bos gestaverit ante. |
| 20 | Herba chelidoniae fertur cum melle mederi |
| 21 | herbaque cum sevo foliis de mille vocata. |