Serenus Sammonicus, Medicinalis, XXXI. Vessicae et calculo purgando
| 1 | si cui vessicae tardus cunctabitur umor, |
| 2 | haec mora rumpetur vino pervicta vetusto. |
| 3 | Proderit ex parvis acinos potare sabucis |
| 4 | aut hederae sucum aut lacrimosi trita sinapi. |
| 5 | Nec non resinas ex Oricia terebintho |
| 6 | in speciem erviliae parvos glomerabis in orbos, |
| 7 | quos ternos tepida mixtos hausisse medella est. |
| 8 | Quondam etiam nimio praeceps urina fluento |
| 9 | inrigat exuvias obscaenoque inficit imbri: |
| 10 | tum leporis cerebrum ex vino potare licebit. |
| 11 | Si dolor internam vessicae concoquet alvum, |
| 12 | subveniet radix frondosae epota cupressi |
| 13 | puleiumve potens domitum ferventibus undis. |
| 14 | Si vero in lapides densus convertitur umor, |
| 15 | qui retinent cursus gemitumque dolore frequentant, |
| 16 | saxifragam seu spongiten succurrere credunt. |
| 17 | Praeterea semen myrti silvestris Iaccho |
| 18 | atque oleo mixtum bibitur, nec desit acetum, |
| 19 | vinaque sumantur fricto condita cumino; |
| 20 | sive palumborum capitur fimus acre ferorum |
| 21 | dulcacidis sparsum sucis trituque solutum; |
| 22 | nec non obscaenus caprae potabitur humor: |
| 23 | obruet hic morbum labefactaque saxa remittet. |