Serenus Sammonicus, Medicinalis, XXVI. Hydropi depellendae
| 1 | corrupti iecoris vitio vel splenis acerbus |
| 2 | crescit hydrops aut cum siccatae febre medullae |
| 3 | atque avidae fauces gelidum traxere liquorem. |
| 4 | Tum lympha interius vitio gliscente tumescit |
| 5 | secernens miseram proprio de viscere pellem. |
| 6 | Conveniet tenerae radix decocta sabuci |
| 7 | in geminis calidi cyathis potanda Lyaei. |
| 8 | Fraxineum semen cum Bacchi rore bibendum est. |
| 9 | Nec non adposito curantur dropace membra, |
| 10 | qui subito raptos ventos sucosque [mire] revellit. |
| 11 | Nec non in tepidis convolves corpus harenis. |
| 12 | Adposituque leves nepetae gustuque iuvabunt. |
| 13 | Saepe et scillino pelluntur noxia Baccho. |
| 14 | Elleboro bene purgatur lymphaticus error. |
| 15 | Aut huius vice sementis scopulosa genestae |
| 16 | miscetur mulsis et cautis ducitur undis. |
| 17 | Est qui praevalidum fricto sale miscet acetum |
| 18 | atque olei suco, refricatque albentia membra |
| 19 | aut calido filicis radicem mollit Iaccho, |
| 20 | unguine quo frangit vires languoris aquosi. |