Serenus Sammonicus, Medicinalis, XXV. Ventris dolori mitigando
| 1 | si dolor insanus tota desaevit in alvo, |
| 2 | heminis tribus in lympha<e> validam coque rutam |
| 3 | atque apium, donec duplex pars desit aquarum: |
| 4 | potus erit medicus non detractante palato. |
| 5 | Praeterea nivei sterilis testa uritur ovi; |
| 6 | quae postquam in taetram fuerit conversa favillam, |
| 7 | ex calidis potatur aquis et pota medetur. |
| 8 | Nec non iungenda est utero nova virga myricae: |
| 9 | inlaesa haec ferro terraque intacta geratur. |
| 10 | Aut medio ventris prodest aspargere terram, |
| 11 | quam signaverunt vestigia pressa rotarum. |
| 12 | Proderit et pulvis facili sub cardine raptus. |
| 13 | Quin etiam ex lymphis tritum potare cuminum |
| 14 | conveniet, quod iam nobis documenta probarunt. |
| 15 | Menta quoque hoc pacto medicos dabit hausta sapores. |
| 16 | Coeliacos autem recreabis pane salubri, |
| 17 | quem madido farre efficies ac mollibus ovis, |
| 18 | quorum testa fero prius evanescat aceto. |
| 19 | Refert et teretes bulbos mollire terendo |
| 20 | cumque his Lenaei durum potare fluentum. |