Serenus Sammonicus, Medicinalis, XXI. Iecoris et lateris vitiis medendis
| 1 | si mollis iecoris fibras dolor angit acerbus, |
| 2 | protinus ex mulsa potanda elelisphagus herba est, |
| 3 | sumitur aut semen, quod fraxinus alta profudit, |
| 4 | vulturiive iecur vel ius perdicis apricae. |
| 5 | Praeterea simili dragma pix dura piperque |
| 6 | franguntur; sic in mollito pulvere iuncta |
| 7 | egelidis miscentur aquis recreantque bibentem. |
| 8 | Absinthi quoque decocti potabitur humor. |
| 9 | Si latus immeritum morbo temptatur acuto, |
| 10 | accensum tingues lapidem stridentibus undis, |
| 11 | hinc bibis; aut aceris radicem tundis et una |
| 12 | cum vino capis: hoc praesens medicamen habetur. |
| 13 | Quid referam multis conposta Philonia rebus, |
| 14 | quid loquar antidotus varias? Dis ista requirat, |
| 15 | at nos pauperibus praecepta dicamus amica. |
| 16 | Nec non et iecoris quaeretur fibra lupini |
| 17 | iungeturque simul costum foliumque piperque; |
| 18 | diluta quae duro dantur potanda Lyaeo. |
| 19 | Est et vis morbi, quod 'telum' commemoratur, |
| 20 | cum subito dolor insanus furit incitus ictu: |
| 21 | Persicus huic potum e nucleo dabit interiore; |
| 22 | quae mihi cura satis casu monstrante probata est. |