Serenus Sammonicus, Medicinalis, XIX. Mammis sanandis vel stringendis
| 1 | ubera fecundo valde lactentia suco |
| 2 | saepe sibi noxae nimium manando fuerunt: |
| 3 | faece igitur valida saevi reprimentur aceti. |
| 4 | Post partum tumidas iniuste adsurgere mammas |
| 5 | interdum aspicies: harum mala commemoratur |
| 6 | murinum fimus ex pluvio sedare liquore. |
| 7 | Sin autem clausas penitus dolor angit acerbus, |
| 8 | lumbricis terrae turgentes ungue corymbos. |
| 9 | Si castigatas studium est praestare papillas, |
| 10 | ex hedera sertis ambas redimire memento, |
| 11 | protinus et raptas fumis mandare coronas; |
| 12 | anseris aut sevum pariter cum lacte tepenti |
| 13 | aut ovum inlinito, tulerit quod garrula perdix. |
| 14 | Praeterea pluvio decocta papavera rore |
| 15 | haerescant, multis post absolvenda diebus. |
| 16 | Vis et Phoebigenae caelestia sumere dona, |
| 17 | ubera cum taetris laniata doloribus horrent? |
| 18 | Navis ramentum et quae nomine prasion herba est |
| 19 | et quae vulgari sermone insana vocatur |
| 20 | (Graecus hyoscyamon propria scit dicere lingua) |
| 21 | nec non et calami radix lapathique legumen |
| 22 | mixta dabunt miras (experto crede) medelas. |